БИШКЕК, 24-апр. — Sputnik. Кыргыз эл жазуучусу, Токтогул атындагы мамлекеттик сыйлыктын лауреаты Кеңеш Жусуповдун 80 жылдыгын белгилөө китеп-сүрөт көргөзмө менен баштала турганын Sputnik Кыргызстан агенттигине Улуттук китепкана жетекчисинин илим боюнча орун басары Рыскулбек Буларкиев билдирди.
Анын айтымында, залкар жазуучунун чыгармачылыгына арналган көргөзмө эртең, 25-апрель күнү саат 11.00дө "Ой алпы, сөз зергери" деген аталыш менен өтмөкчү.
"Кеңеш Жусуповдун 80 жылдык мааракесин белгилөө биздин китепканадан башталат. Кыргыздын чыгармачыл интеллигенциясы, ЖК депутаттары, коомдук ишмерлер чакырылды. Салтанаттын алкагында жазуучунун "Байыркынын изи" жана "Кыргыздын акылмандыгы" аттуу китептеринин бет ачары өтөт", — деди Буларкиев.
Улуу жазуучу Кеңеш Жусупов 1937-жылы Нарын облусунун Тянь-Шань районундагы Он-Арча айылында жарыкка келген. Алгачкы чыгармасы 1958-жылы жарыяланган инсандын "Манас" эпосун иликтөөдө, аны жайылтууда эмгеги абдан зор. Балдарга арналган "Манастын" кара сөз түрүндөгү чыгармасынын автору.
