БИШКЕК, 7-апр. — Sputnik. Кыргызстан Памир кыргыздарына жардам жеткирүүдө Тажикстандан көмөк сураганын Тышкы иштер министрлиги билдирди.
Маалыматка ылайык, тышкы иштер министри Эрлан Абдылдаев Ташкентте өтүп жаткан КМШ МИД жетекчилеринин жыйынына катышты. Абдылдаев бир катар эки тараптуу жолугушууларды өткөрүп, тажик кесиптеши менен сүйлөшкөн.
"Анда Афганистандын Улуу жана Кичи Памирин байырлаган этникалык кыргыздарга гуманитардык жардам жеткирүү маселесинде көмөк көрсөтүү өтүнүчү айтылды", — деп белгиленет маалыматта.
Жолугушуу учурунда тараптар эки өлкө ортосундагы мамиле, чек араны делимитациялоо иштери, саясий, соода-экономикалык жана маданий-гуманитардык жаатта кызматташуу маселелерин талкуулашты.
