БИШКЕК, 1-апр. — Sputnik. Ош облусунда адам өлтүрүүгө шектелип үч киши кармалды. Бул тууралуу Ош ШИИБдин маалымат кызматы билдирди.
Ага ылайык, 30-март күнү милиция тарабынан Ош шаарынын Касымбеков көчөсүндөгү көп кабаттуу үйдөн 45 жаштагы кишинин сөөгү табылган. Алдын ала мааламаттар боюнча маркум көкүрөк тушка сайылган миздүү нерседен улам каза болгон.
Шектүүнүн берген көрсөтмөсүнө караганда, окуя болгон күнү маркумдун үйүндө төртөө эки бөтөлкө арак ичишкен. Аны менен кошо ичкени кукси даярдап жатканда, маркум келип "тездетпейсиңби" дегенде экөө уруша кеткен. Анан ал ачуусу келип бычак менен сайып жиберген. Шектүү жаран өлтүрөйүн деген ою болбогонун, бирок ачуу менен бычактын арт жагы менен урайын дегенде миздүү жагы сайылып калганын айткан. Кармалган үч жаран тең маркумду үйгө жаткарып коюп чыгып кетишкен.
Учурда кылмышка шектелгендер убактылуу кармоочу жайга киргизилип, иликтөө иштери жүрүүдө.
