БИШКЕК, 1-апр. — Sputnik. Өкмөт мүчөлөрү Кыргызстандын аймагында энергоресурстарды автоматтык система аркылуу текшерүү жана эсепке алуу боюнча өндүрүштү уюштуруу маселесин (ЭАСАТ) жумушчу кеңешмеде карашты. Бул тууралуу өкмөттүн маалымат кызматы билдирди.
Аталган жыйын премьер-министр Сооронбай Жээнбековдун төрагалыгы алдында өткөн.
Ал энергетикада "акылдуу эсептегичтер" коммерциялык эсептерди эске алган, жоготууларга жол бербеген, ар бир объектти көзөмөлгө алган, абоненттерге электр энергиясын үнөмдүү жана эффективдүү пайдаланууга шарт түзгөн эсептөөнүн так системасы болуп эсептелерин билдирди.
"Улуттук энергетикалык холдинг компаниясы" ААК башкармалыгынын төрагасы Айбек Калиев "акылдуу эсептегичтердин" жардамы менен коммерциялык жоготууларды азайтууга болорун жана дебютордук карыздарды чогултууда пайдалуу экенин баса белгиледи.
Өлкө аймагында "акылдуу эсептегичтерди" чыгаруу үчүн "Улуттук энергохолдинг компаниясы" Кыргыз-Россия өнүктүрүү фонду менен иш алып барууну пландоодо.
"Улуттук энергетикалык холдинг компаниясы" ААК башкармалыгынын төрагасы Калиев биринчи этапта 200 миң "акылдуу эсептегичтерди" сатып алуу пландалып жатканын жана аталган долбоорду ишке ашыруу мөөнөтү үч жыл экенин белгиледи. Аларды орнотуу менен электр энергиянын жоготуусун 200 миллион кВт саатка азайтууга болорун да кошумчалап, биринчи жылы жоготууларды эки пайызга азайтуу менен 220 миллион сомго чейин үнөмдөп калууга болорун айтты.
