БИШКЕК, 31-мар. — Sputnik. Бишкек — Ош унаа жолундагы Сузак районунун аймагында май ташыган автоунаа басып калган Honda Fit үлгүсүндөгү унаанын ичинде өрттөнүп кеткендер өз ара тууган экени билинди. Бул тууралуу Жалал-Абад ОИИБдин маалымат кызматы билдирди.
Ага ылайык, жеңил автоунаанын ичинде 41 жаштагы айдоочу, анын 39 жаштагы аялы жана айдоочунун 61 жаштагы апасы болгону аныкталган.
"Бишкек шаарынан Ошту көздөй келе жаткан май ташуучу Freightliner үлгүсүндөгү автоунаанын 38 жаштагы айдоочусу рулду башкара албай оодарылып кетип, каршы тараптан келе жаткан Honda Fit үлгүсүндөгү автоунааны басып калган. Натыйжада өрт чыгып, жеңил унаанын ичиндеги үч киши — 41 жаштагы айдоочу, 39 жаштагы аялы жана айдоочунун 61 жаштагы апасы автоунаадан чыга албай өрттөнүп каза болушкан", — деп айтылат ОИИБ тараткан маалыматта.
Ал эми Freightliner үлгүсүндөгү автоунаанын айдоочулары жарат алып, ооруканага дарылануу үчүн жаткырылган.
Каза болгондорго сот-медициналык экспертиза дайындалып, учурда бул факты боюнча алдын ала тергөө амалдары жүрүүдө.
