БИШКЕК, 31-мар. — Sputnik. Көчмөн турмуштун ажырагыс бир бөлүгү болгон боз үйгө чет элдиктердин кызыгуусу арта баштады. Анын мобилдүүлүгү, жөнөкөйлүгү, табигый тазалыгы башка көчмө конструкциялардан бир топ айырмаланууда.
Азыр чет жерлерде боз үйлөр конок жана туристтерди тосуу жагынан жакшы кызмат көрсөтүп, ишкердиктин бир түрүнө айланды.
Мисалы, Улуу Британияда боз үйдө үлпөт тойлорду өткөрүү өтө популярдуу болуп кетти.
Эки жашка көчмөндөр стилинде унутулгус бал айын өткөрүү үчүн мобилдик боз үйлөр дагы сунушталат.
Кадимки эле боз үй Нью-Йорктогу 17-кабаттуу мейманкананын чатырында тигилген. Ачык асман алдындагы үйдө бир түнөө үчүн кардар 2 миң доллар төлөшү керек.
Ал эми Катардын шейхи Сани бин Абдулла Алсани Кыргызстандан атайын боз үй сатып алып, өзүнүн Дохадагы үйүнөн алдына конокторго көрсөтүү үчүн тиктирип койгон.
