БИШКЕК, 30-мар. — Sputnik. Кыргызстандын Транспорт министрлиги Бишкек — Кара-Балта жолун оңдоо үчүн Кытайдын ChinaRailway #5 EngineeringGroupCo., LTD команиясы менен 70 миллион долларлык келишимге кол койду. Бул тууралуу министрликтин маалымат кызматынан билдиришти.
Жол куруу иштери "ЦАРЭС 3 коридорун реабилитациялоо жана жакшыртуу" (Бишкек — Ош унаа жолу) долбоорунун алкагында ишке ашат. Курулуш иштеринин өзүнө үч жыл, иштин кемчиликтерин оңдоого бир жыл кошумча убакыт берилет.
Эске салсак, аталган долбоорду ишке ашырууга Азия өнүктүрүү банкы 100 миллион доллар бөлгөн. Анын 65 миллиону насыяга, калган 35 миллиону грант катары берилген.
Каражат негизги жолду куруудан тышкары эл жашаган аймактарга тротуар салуу, ирригациялык системаны жакшыртуу, жер алдындагы өтмөктөрдү жасоо иштерине сарпталат.
Ошондой эле каржылоонун жаңы ыкмаларын колдонуу менен жолду туура пайдалануу жана кам көрүү боюнча пилоттук долбоор ишке ашырылат.
