БИШКЕК, 29-мар. — Sputnik. Премьер-министр Сооронбай Жээнбеков Бишкек шаарындагы "Ак-Кула" ат майданынын абалын жеринен барып көрдү. Бул тууралуу өкмөттүн маалымат кызматы билдирди.
Жээнбеков ипподромду оңдоп-түзөө керектигин айтып, жыл өткөн сайын улуттук ат оюндарына кызыккандардын саны өсүп жатканын, өзгөчө көк бөрүнү көрөм деп келгендер көп болуп жатканын баса белгиледи.
"Нооруз майрамына карата "Ак-Кула" ипподромунда өткөрүлгөн иш-чара көк бөрүгө кызыккандардын саны бир кыйла көп экенин тастыктады. Ошол эле учурда ат майдандын инфраструктуралык абалы да коомдун кызуу талкуусуна алынды. Андыктан тез аранын ичинде көйгөйлөрдү чечүү керек, анын ичинде көрүүчүлөргө дагы жакшы шарт түзүлүшү зарыл", — деди Жээнбеков.
Бишкек мэриясынын муниципалдык менчик башкармалыгынын жетекчиси Султан Өмүров ат майдан өкмөттүн токтому менен 1995-жылы мэриянын карамагына берилгенин айтты. Бирок 2013-жылы бул аракетти сот мыйзамсыз деп тапкан.
"Ак-Кула" ат майданы 57,4 гектарды ээлеп, 3000 кишинин оюндарды отуруп көрүүсүнө ылайыкталган. Ошондой эле анын аймагында административдик имарат, ат оюндарын өткөрүүчү аянт, жатакана, жылкы сарай жана кампалар жайгашкан.
