Subaru Lagacy автосунун ээси Азирет Валиев жубайы жана иниси менен Бишкектен Ошту көздөй жөнөп баратып, капыстан көчкү алдында калганын билдирди.
"Жолдо 7-8 унаа катар тизилип баратканбыз. Бир маалда аялымдын кыйкырганын уктум. Анан эле үстүбүздөн кар басып калды. Унаа ичинде төрт саатка чейин жакшы эле чыдап отурдук, тамак-аш, суу бар болчу. Кийин аба жетпей эки сааттай кыйналдык", — деди Валиев.
Анын айтымында, абанын жоктугунан дем жетпей унаа ичиндегилер өздөрүн жогото баштаган.
"Акыркы сааттарда абанын жоктугунан үнүм чыкпай, өзүмдү жогото баштадым. Ошондо өлөт окшойбуз деп ойлодум. Бирок бир маалда унаанын айнеги сынып, сырттан жарык көрүнө баштады. Күчүмдү топтоп, тешикке эптеп жетип үн чыгардым. Куткаруучулар жардамга келип чыгарып кетишти", — деди Валиев.
Ал ошондой эле куткаруучуларга ыраазычылыгын билдирди.
