БИШКЕК, 28-мар. — Sputnik. Быйыл кар калың жаап, аба температурасынын жогорулашына байланыштуу тоолуу аймактарда кар көчкү жүрүү коркунучу бар экенин Өзгөчө кырдаалдар министрлиги эскертүүдө.
Кыргызгирометтин өлкө аймагындагы станцияларынан 27-мартка карата алынган маалыматтар боюнча кардын калыңдыгы төмөнкүдөй:
- Төө-Ашуу станциясы — 181 сантиметр;
- Жалал-Абад, Чаткал станциясы — 83 сантиметр;
- Ош, Сары-Таш станциясы — 81;
- Ысык-Көл, Чоң-Ашуу станциясы – 53 сантиметр;
- Нарын, Ат-Башы станциясы — 36 сантиметр кар бар.
Кыргызгиромет 27-28-мартта жаап өткөн, күтүлүп жаткан жаан-чачынга жана абанын температурасынын жогорулашына байланыштуу Кыргызстандын тоолуу райондорунда, Бишкек — Ош автоунаа жолундагы Төө-Ашуу, Ала-Бел, Көк-Бел ашууларында жана Чычкан капчыгайында кар көчкү түшүү коркунучу жогору экенин эскертет.
Ошондой эле Мырзаке — Кара-Кулжа — Алайкуу, Ала-Бука — Каныш-Кыя жолунда дагы кар күрткү түшүшу ыктымал. Андан сырткары, Бишкек — Нарын — Торугат жолунун Долон ашуусунда, Каракол — Эңилчек жолунда кар көчкү жүрүшү мүмкүн.
Мындан улам унаалардын ортосундагы 500 метр аралык кыймыл чектелиши зарыл экени айтылат.
