БИШКЕК, 27-мар. — Sputnik. Биринчи Май райондук соту мурунку акыйкатчы Турсунбек Акунду сегиз сааттык коомдук жумушка кесип, айыпка жыкты. Бул тууралуу Sputnik Кыргызстан агенттигине Биринчи Май райондук сотунун канцеляриясы билдирди.
Эскерте кетсек, 25-март күнү экс-депутат Садыр Жапаровду колдоо иретинде уюштурулган митингди таркатууда тартип бузган 105 киши кармалган. Алардын арасында Турсунбек Акун да бар болчу. Кармалгандардын баары Биринчи Май райондук сотко алып келинип, көпчүлүгү административдик тартип бузганы үчүн жоопко тартылган.
"Соттук процесс бир нече кабинетте өтүп, бир катар судьялар карады. Турсунбек Акунга 1500 сомдук айып пул чегерилип, сегиз сааттык коомдук жумушка тартуу боюнча чечим чыкты", — деп айтылат маалыматта.
Бирок бул маалыматты Турсунбек Акун өзү четке кагып, айыпка гана жыгылганын белгиледи.
