БИШКЕК, 27-мар. — Sputnik. Дөлөн Өмүрзаков атындагы башкы стадиондогу чөптөр жаз кечеңдегенине байланыштуу жакшы чыга элек, ал эми жалпысынан стадион оюнга даяр. Бул тууралуу Sputnik Кыргызстан агенттигине Жаштар иши, дене тарбия жана спорт мамлекеттик агенттигинин маалымат катчысы Нурдин Султамбаев билдирди.
Эртең 28-мартта аталган стадиондо Кыргызстан — Макао командаларынын ортосунда футболдук мелдеш өтөт.
Буга чейин айрым ЖМКлар стадион оюнга даяр эместигин жазып, чөп өспөгөн такыр оюн талаасынын сүрөттөрүн көрсөткөн.
"Кыргызстан — Макао футболчуларынын ортосундагы мелдешке карата башкы стадионду даярдап чыктык. Өткөн жумада ишембилик өткөрүп, тазалап чыгып, мамлекеттик агенттиктин жетекчиси келип өзү баарын текшерип кетти. Жасалма газон эмес, оюн тааласына табигый чөп өстүрүлгөн. Аны жыл сайын күзүндө сээп, анан ал жазда өсүп чыгат. Быйыл кар кеч кетип, күн эми жылый баштагандыктан айрым жерлердеги чөп жакшы өсө элек", — деди Султамбаев.
Футбол сүйүүчүлөр оюнга билеттерди 200 сомдон 500 сомго чейин стадиондун кассасынан алса болот.
