БИШКЕК, 27-мар. — Sputnik. Кадамжай райондук ички иштер бөлүмүнө 27-мартта болжол менен саат 17:00дө Пүлгөн айылында болгон автокырсык туурасында маалымат түшкөн. Окуя Ош-Баткен жолунун 123 чакырымында болгон. Бул туурасында Баткен облусунун ИИББинен билдиришти.
Кабар түшөрү менен Баткен ИИБдин тергөө тобу окуя болгон жерге жөнөп кеткен. Ыкчам топтун кызматкерлери аскер бөлүгүнө тиешелүү болгон КамАЗ ошол көчөдөгү үйдү сүзүп, жарым-жартылай кирип кеткен.
Алдын ала маалыматтар боюнча 30 жоокер түрлүү жаракаттары менен Кадамжайдын аймактык ооруканасына жеткирилген.
Окуяны Баткен ИИБи каттап, райондук тергөө бөлүмү автотехникалык мүнөздөгү экспертизаларды дайындаган.
Министрлик: Санитардык авиация жөнөп кетти
Буга чейинки маалыматтарда Саламаттыкты сактоо министрлиги жаракат алган жоокерлердин саны 28 экендигин, алардын жетөө райондук аймактык оорукананын кайра жандандыруу бөлүмүнө жаткырылган кабарлаган. Маалыматта, алардын абалы оор экени айтылып, алардын бирине жергиликтүү дарыгерлер операция жасап, калгандарына медициналык жардар көрсөтүлүп жатканын кабарланган.
Белгилей кетсек, февраль айынында да дал ушул жерден май ташыган автоунаа үйдүн дубалын сүзүп кирип, оодарылып кеткен. Анда бактыга жараша эч ким каза болгон эмес. Үч киши жеңил жаракат алып ооруканага жеткирилген.
