БИШКЕК, 27-мар. — Sputnik. Баткен облусунун Кадамжай шаарына бурула берилишинде аскерлер бараткан автоунаа жол кырсыгына кабылды. Алдын ала маалымат боюнча анын кесепетинен үч жоокер жаракат алганын облустук ИИББдин маалымат кызматы билдирди.
Ага ылайык, жабырлануучулар аймактык ооруканага жеткирилген.
Саламаттыкты сактоо министрлигинин маалыматына караганда, Кадамжайдагы автокырсыктан 28 аскер түрдүү жаракат алган. Учурда жети киши райондук аймактык оорукананын кайра жандандыруу бөлүмүнө жаткырылды. Маалыматта, алардын абалы оор экени айтылууда. Министрликтен жоокерлердин бирине жергиликтүү дарыгерлер операция жасаганын, калгандарына медициналык жардар көрсөтүлүп жатканын кабарлады.
Жергиликтүү тургундардын айтымында, унаанын кабинасы жарактан чыгып калган. Кырсыктаган КамАЗ автоунаасы Оштогу 92840 аскер бөлүгүнө таандык экени айтылууда.
Белгилей кетсек, февраль айынында дагы дал ушул жерден май ташыган автоунаа үйдүн дубалын сүзө кирип, оодарылып калган. Анда бактыга жараша эч ким каза болгон эмес. Үч киши жеңил жаракат алып ооруканага жеткирилген.
