БИШКЕК, 25-мар. — Sputnik. Биринчи Май райондук сотунда 15 митингчиге карата соттун өкүмү чыккандыгын Sputnik Кыргызстан агенттигине укук коргоочу Токтайым Үмөталиева билдирди.
Анын айтымында, сотко 40ка жакын жаран алып келинген.
"Митингге катышкан 15 жаранга соттун өкүмү чыгарылды. Аларга административдик айып тагылды. Ага ылайык жарандар 500 сомдон 1500 сомго чейин төлөмөй болушту. Эми калгандарынын өкүмүн күтүп жатабыз", — деди Үмөталиева.
Ал ошондой эле учурда беш сот иштеп жатканын айтып, адвокаттар жетишпей жатканын белгиледи.
Белгилей кетсек, Садыр Жапаровду УКМКнын кызматкерлери кыргыз-казак чек арасынан өтүп жатканда кармап, Улуттук коопсуздук мамлекеттик комитетине алып келген. Анын жактоочулары Горький атындагы паркта митинг уюштуруп, андан кийин УКМКнын алдына келишкен. Алар милиция менен тиреше кеткенден кийин укук коргоо органдарынын өкүлдөрү 68 митингчини кармап, калгандарын тараткан.
Экс-депутат Кылмыш жаза кодексинин барымтага алуу, бийлик өкүлүнө карата зомбулук көрсөтүү, өлтүрөм деп коркутуу, бейбаштык беренелери боюнча айыпталууда.
