БИШКЕК, 24-мар. — Sputnik. Ошто милиция кызматкери киши колдуу болгонун Ош шаардык ИИБдин маалымат кызматынан кабарлашты.
Билдирмеге караганда, окуя кечээ, 23-мартта болгон.
"Маркумдун сөөгү Учар айылынын Набережная көчөсүндө жолдун боюнда токтоп турган көк түстөгү Mitsubishi үлгүсүндѳгү унаадан табылды. Ал ИИМдин мыйзамсыз баңги заттарды жүгүртүүгѳ каршы күрөшүү боюнча Ош шаары жана Ош облусу боюнча башкармалыгынын тескөөчү-коменданты, милициянын подполковниги болгон", — деп айтылат маалыматта.
Алгачкы тергөөнүн маалыматтарына караганда, кызматкер башына катуу нерсе менен урулган соккудан каза болгон.
"Милиционер 21-март күнү үйдѳн чыгып кеткен боюнча дайынсыз болчу", — деп белгиленет маалыматта.
Учурда бул факты боюнча тиешелүү экспертизалар дайындалып, адам өлтүрүү беренеси боюнча иш козголгон.
