БИШКЕК, 23-мар. — Sputnik. Улуттук коопсуздук мамлекеттик комитети депутат Өмүрбек Текебаевге карата козголгон кылмыш иши боюнча так жана айныгыс далилдер топтолгондугун билдирди.
Эске салсак, кечээ "Ата Мекен" партиясы Текебаевдин аны күнөөлөп жаткан Россия жараны Леонид Маевский менен жолукканын төгүндөгөн кагаздарды тапканын айтып, элге кайрылуу жасаган.
Ал эми УКМКнын маалыматында депутаттын КР жарандары менен коррупциялык байланыштарды түзгөндүгү айтылат.
"Анын баарынын максаты 2010-жылы "Мегаком" компаниясын башкарууга кызыкдар болгон адамдардан ири өлчөмдөгү акча өндүрүү болгон", — деди ведомствонун маалымат кызматы.
Билдирүүдө Өмүрбек Текебаевдин кылмыш кылганын тастыктай турган бир катар күбөлөр жана документтер бар экени, бирок алар мыйзамга ылайык, кылмыш иши аягына чыккыча ачыкка чыгарылбай турганы айтылат.
