БИШКЕК, 22-мар. — Sputnik. Кыргызстандык окумуштуу Нурлан Наматовду француз интеллигенциясынын арасында кадыр-барктуу Коллеж де Франс окуу жайында лекция окууга чакырылды. Бул маалыматты Sputnik Кыргызстан агенттигине профессор тастыктап берди.
Профессордун айтымында, акыркы 100 жылдын ичинде аталган окуу жайга лекция окуу үчүн мурдагы Советтер Союзунун курамына кирген мамлекеттерден үч гана окумуштуу чакырылган. Биринчиси — 1972-жылы СССР академиги Лев Арцимович, 2014-жылы Россия илимдер академиясынын президенти Владимир Фортов барган. Үчүнчүсү — кыргызстандык Нурлан Наматов.
"15 жыл мурда КНУнун аспиранты элем. Аны аяктаган соң докторантурага тапшырып, Германияга кеткем. Докторлугумду жактап, талаа изилдөөлөрүн өткөргөм. Кийин менин монографияма бүт дүйнө кызыга баштады. Ошентип ханзаада Уэльский өзү көз кырын салган Улуу Британия падышалык коомунун мүчөсү болдум. Илим жаатында бул чоң жетишкендик", — деди Наматов.
Мындан тышкары, профессор Елизавета II ыйгарган ордендин рыцарь командору болгон.
Андан соң Наматов испан окумуштуулары менен беш жылдык изилдөөгө катышып, кардинал Ришелье, Тереза эне, Испания падышасы Филипп II сыяктуу адамдар бүтүргөн Комплуденс окуу жайынын профессору наамына ээ болгон.
