БИШКЕК, 22-мар. — Sputnik. Өкмөт башчысы Сооронбай Жээнбеков аба ырайынын өзгөрүшү менен өзгөчө кырдаалдар түзүлүп жаткандыгына байланыштуу аймактарда алдын алуу иштерди жүргүзүү керектигин белгиледи.
Бүгүн Жээнбеков өзгөчө кырдаалдардын алдын алуу жана анын кесепеттерин жоюу чаралары боюнча жыйын өткөрдү.
Белгилей кетсек, Ак-Сай өрөөнүндө 12-14-мартта кар аралаш бороон болуп, жолду жаап калган. Жол ачылганга чейин Ат-Башы районуна өзгөчө кырдаал киргизилген.
"Транспорт жана жолдор министрлиги менен Өзгөчө кырдаалдар министрлиги аймактардагы алыскы айылдарга тоскоолдуксуз барууну камсыздаш керек. Алыскы аймактардын тургундарына бардык жардамдар убагында жеткирилиши зарыл", — деди өкмөт башчы.
Өзгөчө кырдаалдар министринин орун басары Калыс Ахматов жаратылыш кырсыктарынын алдын алуу максатында аймактарда алдын алуу иштери жасалып жатканын билдирди. Өзгөчө Ат-Башы районунун Ак-Сай аймагында кар калың жаап бир топ кыйынчылыктарды жаратканын айтты.
"Ак-Сай өрөөнүндө кардын калыңдыгынан улам байланышсыз калган малчыларды куткаруу иштери жүрүүдө. ӨКМ башчысы Кубатек Боронов жеринде көзөмөлдөп жатат. Азык-түлүк жана жылуу буюмдар жүктөлгөн эки КамАЗ бүгүн Ак-Сайга жөнөтүлөт", — деди ал.
Андан сырткары карды тазалоого КР Коргоо комитетинин техникасы тартылганын кошумчалады. Транспорт жана жолдор министри Жамшитбек Калилов өзгөчө кырдаалдар боюнча жүргүзүлүп жаткан иштер тууралуу маалымат берди.
Өз кезегинде Жээнбеков тиешелүү министрликтер менен ведомстволорго калктын коопсуздугун камсыз кылууну тапшырды.
