БИШКЕК, 18-мар. — Sputnik. Бишкекте "Саясий укук жана сөз эркиндиги үчүн" деген аталыштагы жөө жүрүш болуп, анда бир катар активисттер кармалды. Бул тууралуу акциянын уюштуруучуларынын бири Адиль Турдукулов маалымдады.
Zanoza, "Азаттык" жана "24.kg" агенттиктеринин журналисттерин колдоо максатында уюштурулган жөө жүрүш Токомбаев көчөсүнөн (Түштүк дарбазадан) башталган. Саясатчы, журналисттерден баш болгон активисттердин колоннасы Байтик Баатыр/Абдрахманов көчөсүнөн Чүй проспектисине чейин басып келди. Абдрахманов менен Москва көчөлөрүнөн бир нече активист кармалган.
"Жөө жүрүштө Свердлов сотуна чейин жолго чыгууга болбойт деген чечим чыккан. Бирок тынч жөө жүрүштүн айрым катышуучуларын милиция кызматкерлери кармап кетишти", — деди Sputnik Кыргызстан агенттигине активист Адиль Турдукулов.
Эскерте кетсек, 1-мартта Жогорку Кеңештеги "Ата Мекен" фракциясынын лидери Өмүрбек Текебаевдин адвокаттары эл өкүлүнө таянып, маалымат жыйында 16-январда Бишкекке кулаган учактагы жүк Алмазбек Атамбаевге таандык экендигин айтышкан. Жыйынтыгында Башкы прокуратура Таалайгүл Токтакуновага, Канатбек Азизге жана "Азаттык", Zanoza, "24.kg" маалымат агенттиктеринин үстүнөн арыз менен сотко кайрылган.
