БИШКЕК, 16-мар. — Sputnik. Нарын облусундагы ирригациялык тармактын оңдолушу менен аймактын 25 миң жашоочусу таза суу менен камсыз болгонун өкмөттүн аталган дубандагы өкүлүнүн орун басары Касен Асизов билдирди.
Анын айтымында, 52 чакырымдай каналдар оңдолуп, 9 миң гектардан ашык айдоо жерине суу чыккан. Ошондой эле насостук станция да курулган.
"Мунун баары Россиянын каржылоосу менен ишке ашып жаткан ПРООНдун долбоорлорунун алкагында жасалды", — деди Асизов.
Ал ошондой эле аймактарда жашаган эки миңдей киши таза суу менен туруктуу камсыз болорун кошумчалады. Ал үчүн 28 трансформатор коюлуп, беш чакырымга электр зымы тартылган. Ошондой эле облуста 84 ишкана ачылып, ал жакта 375 киши иштеп жатканы айтылды.
