БИШКЕК, 13-мар. — Sputnik. Жогорку Кеңештин "Ата Мекен" фракциясынан депутат Аида Салянова Улуттук коопсуздук комитетине кайрадан чакырылганын Sputnik Кыргызстан агенттигинин кабарчысына эл өкүлүнүн адвокаты Улан Жумаков билдирди.
Анын айтымына караганда, депутат суракка саат 15.50дө өзүнүн экинчи адвокаты Чынара Жакупбекова менен бирге кирген. Жактоочу Салянова ага карата козголгон кылмыш ишине байланыштуу чакырылганын белгиледи.
Ал ошондой эле Салянованын тарапташтары УКМК имаратынын алдында жок экенин кошумчалады.
"Ата-Мекен" фракциясынын депутаты Аида Саляновага өткөн жылдын 26-декабрында Максим Бакиевдин жакын санаалашы Алексей Елисеевдин иши боюнча Кылмыш жаза кодексинин 304-беренеси (кызматтан кыянаттык менен пайдалануу) боюнча кылмыш иши козголгон.
Салянова юстиция министри болуп турганда Елисеевдин адвокаттык лицензиясын калыбына келтирип берген деп айыпталууда.
