БИШКЕК, 13-мар. — Sputnik. "Дыйкан" базарынын соодагерлери Жогорку Кеңештин алдында митинг өткөрүп жатышат.
Sputnik Кыргызстан агенттигинин кабарчысына соодагерлердин бири Гүлзия Курамаева рынокту башка жакка көчүрбөөнү суранып жатышканын билдирди. Уюштуруучулардын айтымында, каршылык акциясына 300гө жакын адам катышып жатат. Алар акция санкциясыз өткөрүлүп жатканын моюндашты.
"Биз эки кат жөнөткөнбүз, бирок канааттандырарлык жооп алалбадык. Бизге бирөөлөр келип "каматып салабыз" деп коркутушту", — деп билдирди Курамаева.
Ал ошондой эле сатуучулардын насыясы бар экенин билдирип, "Сары-Өзөн" рыногунан орун алуу үчүн үч миң доллар пара берүүгө алдары жок экенин белгиледи.
Текшерүү иштери ноябрь айында дагы жүргүзүлүп тогуз мыйзам бузуу ликвидацияланганы аныкталган. Анткен менен айрым курулуш иштерине карата уруксат кагаздары берилген эмес. Ошондой эле базар менен нефть базасынын аралыгы 30 метрди гана түзөт. Эреже боюнча нефть сакталган жайдын алыстыгы 100 метрден кем болбоосу керек.
