БИШКЕК, 10-мар. — Sputnik. Sputnik Кыргызстан маалымат агенттиги жана радиосу II Дүйнөлүк көчмөндөр оюндарын мыкты чагылдырганы үчүн президент Алмазбек Атамбаевдин ыраазычылык каты менен сыйланды.
2016-жылы өткөн Көчмөндөр оюндарынын алкагында Sputnik Кыргызстан агенттиги 500гө жакын маалымат чыгарган. Анын ичине 62 мамлекеттен келген спортчулар менен эксклюзивдүү интервьюлар, сүрөт түрмөктөрү жана видеолор кирет.
Сыйлык тапшыруу аземи "Ала-Арча" мамлекеттик резиденциясында премьер-министр Сооронбай Жээнбеков менен президенттин аппарат жетекчиси Сапар Исаковдун катышуусунда өттү.
"II Дүйнөлүк көчмөндөр оюндарын чагылдыруудагы зор эмгегиңиздер үчүн ыраазычылык билдиребиз. Мамлекеттүүлүктү чыңдоого жана өлкөнүн эл аралык аренадагы аброюн көтөрүүгө кошкон салымыңыздарды жогору баалайбыз. Сиздердин жамаатка ийгилик, кажыбас кайрат каалайбыз", — деп президенттин катында айтылат.
Sputnik Кыргызстан агенттигинин жетекчиси Елена Череменина мындай сыйлык чоң мааниге ээ экендигин белгиледи.
"Кыргыз элинин маданиятын, таланттарын чагылдырган долбоорлорубуз мамлекеттин аброюн көтөрүүгө салым кошуп жатат деп ишенебиз. Мындай деңгээлдеги сыйлык биз үчүн чоң мааниге ээ", — деди Череменина.
Дүйнөлүк көчмөндөр оюндары — Олимпиада оюндарынын аналогу, биринчи жолу Ысык-Көлдүн жээгинде 2014-жылы өткөн. Оюндар улуттук спорттун 26 түрү боюнча өтөт. 2016-жылы 62 мамлекеттин спортчулары катышкан. Жалпы 387 медаль ойнотулуп, алардын 111и алтын, дагы ушунчасы күмүш, 165и коло медаль болгон.
Sputnik Кыргызстан ондогон өлкөлөрдө мультимедиалык хабдары бар эл аралык маалымат агенттиги жана радиосунун бир бөлүгү болуп саналат. Sputnik өз карамагына 30дан ашуун тилде жарык көргөн сайттарды, аналогдук жана санарип радиоберүү, мобилдик тиркемелерди, жана социалдык тармактагы баракчаларды камтыйт. Катталуучулар үчүн жаңылыктар англис, араб, испан жана кытай тилдеринде жарыяланат.
