БИШКЕК, 10-мар. — Sputnik. "Курманжан Датка" тасмасынын режиссеру, Жогорку Кеңештин депутаты Садык Шер-Нияз өзүнүн Facebook баракчасына "Манас" эпосун тасма кылып тартуу идеясын жазып чыкты.
Айкөл Манас тууралуу тасма тартуу идеясы бизди дагы кайдыгер калтырбай, Sputnik Кыргызстан агенттиги режиссердун өзүнө кайрылды. Садык Шер-Нияздын айтымында, маселенин баары каражатка такалат. Анткени "Манасты" тартууга жок эле дегенде эки миллион доллар керек, ансыз тартуунун зарылдыгы жок.
"Бирок азыр мамлекетте бюджет тартыш болуп турат. Элдин ичинен чыккан эр-азаматтар менен сүйлөшүп көрсөм, колдоого алгандар болуп атат. Бирок бул каражатты топтоого бир жылдай убакыт талап кылынышы мүмкүн. Ал эми тартууга эки жылдай убакыт кетет", — деди Шер-Нияз.
Анын айтымында, Манасты бир эле тасмага батырып коюу мүмкүн эмес. Ошол себептүү тартылчу фильмге эпостогу орчундуу окуяларды киргизүү пландалууда.
"Албетте, чоң фильм болгондон кийин кайсы бир техникаларды сатып алышыбыз мүмкүн. Бирок жалпысынан тасманы "Айтыш фильм" студиясы тарта аларынан күмөн санабайм. "Манасты" тартуу оңой иш эмес экенин түшүнөм, өтө көп эмгек, каражат талап кылынат. Бирок акча жок деп эле отура берсек, эч качан кино тарта албайбыз. Жетпей калган каражатты прокат менен жаап койсок болот", — деди режиссер.
Маалыматка караганда, тасманын сценарийи боюнча талкуу, талаш-тартыш, кеп-кеңештер болуп жатат. Бирок өзөгү даяр.
