БИШКЕК, 8-мар. — Sputnik. Кант шаарынын аймагынан волокон-оптикалык байланыш линиясында авария болгонун "Кыргызтелеком" ААКтын маалымат кызматы билдирди.
Каракол шаарынын тургундары облус боюнча интернет өчүп калганын социалдык тармактарда жазышкан. "Кыргызтелеком" бул маалыматты тастыктады.
"Болжол менен таңкы саат 4төр чамасында Кант менен Токмок шаарынын ортосундагы оптоволокна линиясы үзүлгөн. Ысык-Көл, Нарын жана Чүй облусунун Кант шаарынан ары жагы интернетсиз калган", — деп "Кыргызтелекомдун" маалымат кызматы билдирди.
Кабель үзүлгөндүгү тууралуу маалымат келери менен техникалык бригада дароо окуя болгон жерге жөнөп, калыбына келтирүү иштерин башташкан.
"Саат 12:18де волокон-оптикалык байланыш линиясы калыбына келтирилген", — деп маалымат кызматы билдирди.
Аталган линияны белгисиз жарандар кесип уурдоого аракет кылышканын компаниядан маалымдашты.
