БИШКЕК, 7 мар — Sputnik. Бишкекте милиция кызматкерин сүзүп кеткен окуя боюнча күбө Sputnik Кыргызстан агенттигине окуянын чоо-жайын айтып берди.
Буга чейин ЖМК өкүлдөрү УКМК кызматкери милицияны сүзүп кеткенин жазып чыгышкан. Тартип коргоо органдарынын маалыматы боюнча, чекист спирт ичимдигин ичкен жана ал убактылуу кармоочу жайга киргизилген.
Күбөнүн айтымында, ал унаа коюп кеткен убактытты так айтып бере албайт, анткени бул учурда атайын делегациянын кортежи өтүп жаткандыктан милиция кызматкерлерине убактылуу кыймылды токтото турууну буйрушкан.
"Ошол учурда УКМКнын 9-кызматынын гаражынан атайын унаа чыккан. Жүргүнчүлөрдү туруп турууну суранганда, алар орой жооп берип, айрымдары секирип кетейин дешти. Бирок, туура эмес багыт алып, милиция кызматкерин сүзүп кетишти. Анан алар кайра УКМКнын гаражына жашынып калышты", — деди күбө.
УКМК буга чейин окуяга күнөөлүү тарап катуу жазаланарын билдирген.
Эске салсак, Бишкекте ЕАЭБдин өкмөттөр аралык кеңеши өтүп, анда өлкөгө аталган биримдиктин өкмөт башчылары келишкен жана жолдор убактылуу жабык болгон.
