БИШКЕК, 7-мар. — Sputnik. Бишкекте Улуттук коопсуздук мамлекеттик комитетинин кызматкери милиционерди коюп кеткенин K-News агенттиги укук коргоо органдарына таянуу менен жазып чыкты.
Маалыматка ылайык, окуя кечээ саат 22:00дөр чамасында АКШ элчилигинин айланасында болгон. Агенттиктин билдиришинче кармалган киши УКМКнын 9-башкармалыгында (мурдагы мамлекеттик коргоо кызматы) иштейт. Анын мас экени экспертизанын жыйынтыгында аныкталган. Түрдүү жаракаттарды алган милиция кызматкери ооруканага жеткирилген.
K-News агенттигинин маалыматы боюнча Кылмыш жаза кодексинин 341 беренеси "Бийлик өкүлүнө карата күч колдонуу" боюнча кылмыш иши козголгон. Шектүү жаран убактылуу кармоо жайына киргизилди.
Улуттук коопсуздук мамлекеттик комитети кызматтык иликтөө башталганын Sputnik Кыргызстан агенттигине билдирди. УКМК эгер кызматкердин күнөөсү аныкталса ага карата катуу жаза колдонулат деп ишендирди.
Ал эми ИИМдин маалымат кызматынын жетекчиси Бакыт Сейитов менен комментарий алуу үчүн байланышканга такыр мүмкүн болгон жок.
