БИШКЕК, 7-мар. — Sputnik. Жалал-Абад облусунун Сузак районунун 55 жаштагы тургуну аялын, баласын бычактап өлтүрүп, кызын жарадар кылгандан кийин өз жанын кыйган. Бул тууралуу ИИМ билдирди.
Маалыматка ылайык, 6-мартта болжол менен саат 15:30дар чамасында Сузак районундагы Ырыс айыл аймагындагы үйлөрдүн биринде оор кылмыш жасалганы тууралуу маалымат түшкөн. Окуя болгон жерге ыкчам иликтөө тобу жана прокуратуранын кызматкерлери чыгып кеткен.
"Үйдүн айланасын текшере келгенде 55 жаштагы үй ээсинин сөөгү табылган. Андан кийин үйдүн короосунан 54 жаштагы аялдын, анын жанында 21 жаштагы баланын бычакталган сөөгү табылган", — деп айтылат маалыматта.
Андан сырткары, аймактык ооруканага үй ээсинин 29 жаштагы бычак жеген кызы жеткирилген.
"Үй-бүлөдө 5-мартта уруш чыккан. Анын эртеси үй ээси эртең менен мечитке кетип, болжол менен саат 15:00дөр чамасында үйүнө келип, жаңжал маалында аялын, баласын, кызын бычак менен сайып, андан кийин өз жанын кыйган", — деп ИИМдин маалымат кызматы билирди.
Аталган факты боюнча Сузак РИИБи адам өлтүрүү беренеси боюнча кылмыш ишин козгоп, тиешелүү сот-медициналык экспертиза дайындалды. Тергөө амалдары уланууда.
