БИШКЕК, 3-мар. — Sputnik. "Пусть говорят" телепрограммасынын редакторлору кызы менен энеси бийлеген видеонун каармандарын издеп жаткандыгын Sputnik Казакстан жазып чыкты.
Жамиля менен Асем Кулмухамбетовдорду телепрограмманын "Аффтар жжот" берүүсүнө чакыруу көздөлүп жатат. Кулмухамбетовдордун видеосу Россиянын Биринчи каналы аркылуу 1-мартта көрсөтүлгөн. Телеканалдын редакциясы кимдир бирөө аларды тааныса кабар берүүнү өтүнгөн.
Ал эми Асем өзү апасы экөөбүн россиялык тележурналисттер издеп жаткандыгы тууралуу кабардар экенин билдирди.
"Биз өзүбүз көргөн эмеспиз, бирок телефон чалып айткандар көп болду. Бул теманын үстүндө апам экөөбүз сүйлөшө элекпиз. Эгер чакырып калышса барбайбыз го", — деди Асем.
Аталган видео өткөн жылдын жай айларында жарыяланып казакстандыктар арасында популярдуулукка ээ болгон. Аны жергиликтүү телеканалдардын бири дагы көрсөткөн. Коомчулуктун жакшы-жаман пикирлери Асемдин апасын капаланткан. Кийин Асем мындай видеолорду экинчи тартпай турганын билдирген.
