БИШКЕК, 1-мар. — Sputnik. Жусуп Баласагын атындагы Улуттук университеттин студенттери мүмкүнчүлүгү чектелген жарандарга жардам берүү үчүн өздөрү тамак жасап, кайрымдуулук жарманкесин өткөрөрүн иш-чараны уюштуруучулардын бири Раззак Сатипов Sputnik Кыргызстан агенттигине билдирди.
Анын айтымында, мындай кайрымдуулук акциялары жылына эки ирет өтүп турат.
"Өткөн жарманкеден түшкөн акчаны толугу менен жетим балдар үйүнө бергенбиз. Бул жолу чогулткан каражатыбызды эки көзү тең азиз мекендешибизге берели деп жатабыз. Ал кишинин эки баласы бар, үй-бүлөсү жардамга муктаж экен", — деди студент.
Маалыматка караганда жарманке 3-март күнү саат 10.00дө Улуттук университеттин башкы корпусунун алдында башталат. Иш-чарага жалпысынын 30дан ашуун студент катышат.
Уюштуруучулардын айтымында, жарманкеде сатылчу тамак-аш коомдук тамактануучу жайлардыкына караганда алда канча арзан болот.
