БИШКЕК, 27-фев. — Sputnik. УКМК "Ата Мекен" фракциясынын депутаты Алмамбет Шыкмаматовду кайрадан суракка чакырды. Бул тууралуу депутат Sputnik Кыргызстан агенттигине өзү билдирди.
Эске салсак, буга чейин Алмамбет Шыкмаматов УКМКга барып 10 саатка чукул сурак берип келген.
"Мени бүгүн саат 15:00гө суракка чакырды. Азырынча эч нерсе айта албайм. Камап да коюшу мүмкүн", — деди Шыкмаматов.
Белгилей кетсек, 26-февралда таң эрте Улуттук коопсуздук мамлекеттик комитети "Ата Мекен" фракциясынын лидери Өмүрбек Текебаевди эл аралык "Манас" аэропортунан кармап, 48 саатка камакка алган. Мындан улам УКМК алдында мөөнөтсүз митинг башталган.
Шыкмаматов коррупция менен шектелип, Башкы прокуратура тарабынан кылмыш иши козголгон.
