БИШКЕК, 26-фев. — Sputnik. Сокулук райондук сотунун чечими менен "Ата Мекен" партиясынын жаштар канатынын мүчөлөрү эки суткага камалды. Бул тууралуу аталган партиянын маалымат кызматы билдирди.
Буга чейин Текебаевге карата "коррупция" жана "алдамчылык" беренелери боюнча кылмыш иши козголгондугу маалымдалган.
Иш УКМК тарабынан түшкөн материалдарды иликтөөнүн негизинде козголгон. Атайын кызматка Текебаевди сот жоопкерчилигине тартуу өтүнүчү менен Россиянын телекоммуникациялык компанияларынын ээси Леонид Маевский кайрылган.
Маевский арызга Текебаев 2010-жылы Убактылуу өкмөттүн төрага орун басары болуп турганда ага MegaCom компаниясынын акциясын алууга жардам берем деп бир миллион доллар алганын жазган.
Депутатка карата кылмыш иши Башкы прокуратура тарабынан козголуп, УКМК тергөө иштерин жүргүзүп жатат.
"Укук коргоо органдарынын кызматкерлери күч колдонуп, депутатты күтүп турган адамдарды кармашты. Алардын ким экендигин териштирип отурбай эле, милициянын автобусуна салышкан. Алардын арасында журналисттер жана Жогорку Кеңештин депутаты Каныбек Иманалиев да бар болчу", — деп жазылат маалыматта.
Кармалгандардын бардыгы Чүй облусунун Сокулук РИИБине жеткирилген. Жактоочулардын кийлигишүүсү менен депутат менен журналисттер чыгарылган.
Учурда аталган административдик иш боюнча соттук отурум болуп, аларды эки суткага камоо чечими чыкты.
Кармалгандар Чүй облусунун Сокулук РИИБинин убактылуу кармоочу жайына киргизилген.
"Ата Мекен" саясий партиясы укук коргоо органдары тарабынан жасалган иш аракеттерди мыйзамсыз деп санайт.
