БИШКЕК, 24-фев. — Sputnik. Эсеп палатасы тарабынан Жусуп Баласагын атындагы Кыргыз улуттук университетинде жүргүзүлгөн аудитте 9,9 миллион сомдук каржылык мыйзам бузуулар болгону аныкталды. Бул тууралуу Эсеп палатасынын маалымат кызматы билдирди.
Текшерүүнүн жыйынтыгында каражаттын ашыкча чыгымы — 9,5 миллион сомду түзсө, анын ичинен: негизсиз төлөнгөн эмгек акылар – 2,9 миллион сом, дебитордук карыздарды эсепке алуу боюнча жашыруулар жана ашырылган насыялык карыздар – 6,6 миллион сом болгон. Окуу жайдын бюджетинин кирешеси ашыгы менен көрсөтүлүп, анын ичинен бюджетке чегерилүүгө тийиш болгон ижара төлөмү – 0,4 миллион сом болгон.
Андан сырткары, 2016-жылдын 1-январына карата КУУнун жана институттардын бухгалтердик эсебинде 5,5 миллион сомдук дебитордук карыз көрсөтүлгөн эмес. Институттарды жоюуга байланыштуу бул каражаттар өндүрүлүүгө жана калыбына келтирилүүгө жатпайт. Ошондой эле, КУУнун бухгалтердик эсебинде жатаканада жашагандыгы үчүн ижара төлөмү боюнча 1,1 миллион сомдук дебитордук карыз көрсөтүлгөн эмес.
