БИШКЕК, 22-фев. — Sputnik. Түштүк Кореянын түштүк-батышындагы бир фермада куш тумоосу чыкканын адистер тастыкташты. Бул тууралуу РИА Новости Рейтер агенттигине шилтеме берүү менен билдирди.
Өткөн жумада Сеулдан 390 чакырым алыстыкта жайгашкан Чолла-Намдо провинциясындагы фермалардын биринде өрдөктөр куш тумоосуна кабылган болчу. Аларда H5N8 штаммындагы вирус табылган.
Өлкөнүн Саламаттык сактоо министрлиги 23 миң өрдөктү жок кылууну буйруган. Бул окуядан көп өтпөй эле дагы бир фермадагы канаттуулардын ооруп жатканы маалымдалган. Андан сырткары, 6-февралда өлкөнүн түштүк-батышындагы тоок фермада дагы вирус чыккан.
Кишинин аталган дартка чалдыкканы каттала электигин өлкө бийлиги билдирүүдө.
