БИШКЕК, 22-фев. — Sputnik. Быйыл кыргызстандык зыяратчыларды Сауд Аравиянын Flaynas авиакомпаниясы ташыйт. Бул тууралуу муфтият билдирди.
22 Бирдин айы 2017, 09:56
Конкурска бир гана Flaynas авиакомпаниясы арызын берген. Убактылуу республикалык штабдын өкүлдөрү бир добуштан аталган авиакомпанияны тандашкан.
Быйыл авиабилеттин баасы 1550 АКШ долларды түзгөнүн компаниянын өкүлдөрү билдирди. Былтыр дагы авиабилеттин баасы 1550 долларды түзгөн.
Кыргызстандык зыяратчыларды Boeing 767-300 учагы ташыйт. Ажыларга 30 килограмм жүк, 10 килограмм кол жүк, 5 литр зам-зам суусун алууга уруксат берилди.
Белгилей кетсек, 19-январда Кыргызстан мусулмандарынын Дин Башкармалыгы ажыларды ташууда Кыргызстан менен Сауд Аравиянын жарандык авиакомпаниялары ортосунда конкурс жарыялаган болчу.
