ОШ, 21-фев. — Sputnik. Чаткалдын Ак-Таш айылында төрөтү жакындаган эки келин 10-февралда райондогу төрөт үйүнө жеткирилген. Алардын бири 21 жаштагы келин уул төрөгөн. Бирок жол жабык болгондуктан кайра Ак-Таш айылына келе албай убара болууда. Бул тууралуу Ак-Таш айылынын фельдшер-акушердик пунктунун фельдшери Замирбек Рысдөөлөтов аймактык кабарчыга билдирди.
Маалыматка ылайык, келин учурда Курулуш айылында жакындарынын үйүндө жашап жатат. Экинчи келин төрөт үйүндө.
"Ал эми кан басымы жогорулап, же дагы башка оорураак илдеттерге чалдыккандарды бүгүн жолдун бир тарабы ачылгандыктан Ош шаарына же Ала-Бука районундагы ооруканага жибере баштадык", — дейт ал.
Эске сала кетсек, Чаткал районунда 10 күндөн бери тынбай жааган кардан улам Каныш-Кыя жана Чаткал айыл аймактарында анын калыңдыгы эки метрге чейин жетип, ички чарбалык жолдор жабылган.
Ак-Таш айылынын башчысы Таалай Кочкоров жолду тазалоо иштери жүрүп жатканын, азыр кар алдында эки чакырымдай жол калганын кошумчалады.
