Азия оюндары: кыргызстандык хоккейчи бокс ыкмасы менен кувейттиктерди жаткыра чапты

БИШКЕК, 20-фев. — Sputnik. Кышкы Азия оюндарында Кыргызстан менен Кувейттин хоккейчилери арасында мушташ чыгып кеткенин Sputnik Кыргызстан агенттигине Жаштар иши, дене тарбия жана спорт агенттигинин маалымат кызматынан кабарлашты.

Оюн кечээ Япониянын Саппоро шаарында өткөн. Кыргызстандык хоккейчилер биринчи оюнда кувейттик спортчулар менен жолугуп 5:0 эсебинде жеңишке жетишкен.

Мушташ тууралуу Кыргызстан курама командасынын машыктыруучусу түшүндүрмө берди. Анын айтымында, бул кадыресе эле көрүнүш.

"Биздин оюнчулар шайбаны дарбазага киргизип жатканда каршылаштары алардын дарбазачысын таяк менен уруп жаткандай кабыл алышты. Чынында шайбаны эле уруп жатышкан. Бир маалда кувейттик команданын коргоочулары спортчу Урмат Шейшеновду түрткүлөй башташты. Кыргызстандык хоккейчилер аларды ажыратууга аракет кылганда тигилер кара күчкө салып муштум көтөрүштү. Ошондо биздин Канат Абылмечин аттуу оюнчубуз бокстун жөнөкөй ыкмаларын колдонуу менен бир нече каршылашын жыгып койду", — деди Жакыпов.

Башкы машыктыруучу хоккейде мындай мушташтар болуп келгенин билгиледи.

VIII Азия оюндары спорттун 11 түрү боюнча өтүп жатат. Анда 1500гө жакын спортчу жана 30 олимпиадалык комитеттин расмий өкүлдөрү катышууда.

Кошумчалай кесек, VIII Кышкы Азия оюндарында Кыргызстандын намысын спорттун төрт түрү боюнча 33 спортчу коргоп жатат.