Балдар өлүмүн жана жол кырсыктарын азайтуу максатында Ош облусунда "Көңүл бургула, балдар!" аттуу рейд өткөрүлүп жатканын облустук ИИБдин патрулдук бөлүм башчысынын орун басары Маданбек Кубатов билдирди.
Анын айтымында, балдар жабыркаган жол кырсыктары мамлекеттин бирден бир көйгөйлүү маселеси бойдон калууда.
"Былтыр Ош облусу боюнча 761 жол кырсыгы катталып, андан 1239 адам түрдүү жаракат алган. Ал эми балдардын катышуусу менен 220 жол кырсыгы болсо, андан 233 бала жабыркап, ооруканага түшкөн. Жыл башынан бери өспүрүмдөр кабылган 16 жол кырсыгы болду", — деди Кубатов.
Ал рейддин алкагында мектеп окуучуларына жол эрежелери үйрөтүлүп, милиция кызматкерлери ата-энелер арасында түшүндүрүү иштерин жүргүзүп жатышканын белгиледи. Мындан тышкары, мугалимдер үчүн окуулар уюштурулуп, айрым жерлерге жол чырак коюу сунушу берилди.
