БИШКЕК, 11-фев. — Sputnik. Жер ортолук деңиз өлкөлөрүнүн жана Израилдин туристтери Кыргызстанды Казакстан аркылуу билүүгө аргасыз болуп жатат. Мындай пикирин Sputnik Кыргызстан агенттигине израилдик "Kyrgyz Trips" туристтик агенттигинин негиздөөчүсү Алекс Супинский билдирди.
Алекс Супинский — 10 жылдан бери Кыргызстанга келип жүргөн Израиль жараны. Бир нече жыл мурда Кыргызстан тууралуу маалыматтарды камтыган сайт ачкан. Кийин израилдиктер арасында Кыргызстанга кызыгуу күч алганын байкап, "Kyrgyz Trips" туристтик агенттигинин негиздеген. Өзүнүн айтымында, жыл сайын фирмасы аркылуу Кыргызстанга 3-4 миң турист алып келет.
Ал жыл сайын Тель-Авив шаарында өткөн эл аралык International Mediterranean Tourism Market (IMTM 2017) туристтик жарманкесине Кыргызстандын атынан катышат. Быйыл иш-чара 7-8-февраль күндөрү өттү.
Анын айтымында, Израилде кыргыз өкүлчүлүгүнүн жоктугу да оорчулукту жаратат.
"Мен Кыргызстан тууралуу көп нерсени билгеним менен расмий макамым — туристтик агенттиктин директору. Ал эми Кыргызстан расмий өкүлүнө берилчү суроолор болсо эле Казакстандын элчилигине жөнөтүүгө аргасыз болом. Анын үстүнө Израиль менен Казакстан учурда визасыз режимди киргизип койгон. Ошол себептүү Кыргызстанга баргысы келген туристтер алгач Алматы шаарына учуп барып, андан ары Бишкекке же Каркырага өтүп кетүүгө аракет кылышууда", — деди ал.
Ал эми Тышкы иштер министрлигинин расмий сайтындагы маалыматка караганда, учурда Израилде Кыргызстандын эки ардактуу консулу бар. Алар Хайфа шаарынын тургуну Галия Лихтер менен Холон шаарынын тургуну Габриэль Ваноно.
IMTM 2017 — 23 жылдан бери Израилде өтүп келе жаткан кесипкөй туристтик жарманке. Ал Жер ортолук деңиз өлкөлөрүнүн арасында да эң ири туристтик иш-чара болуп эсептелет. Жарманкеде 80 өлкөдөн келген туристтик компаниялар өз кызматтарын сунуштап, тажрыйба алмашышат.
