БИШКЕК, 8-фев. — Sputnik. Жогорку Кеңештин депутаты Айнуру Алтыбаева өлкөдө алтын алуучу фабрикалар курулмайынча Кыргызстанда баалуу метеллдар рыногу өнүкпөй турганын парламенттин жыйынында билдирди.
"Казакстандын компаниялары биздин кенди күнү-түнү ташып жатат. Алтын куймаларын куюп, ошол эле алтын менен кайтадан биздин рынокко кирип жатат. Биздин инвесторлор менен түзүлгөн ар бир келишимдеги шарт боюнча алар алтын бөлүп алуучу фабрика куруш керек, бирок алар аны жасаган жок. Аларга фабриканын пайдасы жок, андыктан биздин кенди бажы төлөмү жок ташып жатат", — деди депутат.
Ал ошондой эле беш жылдан бери өкмөт алтын кендерин ташууда бажы төлөмүн киргизүүгө каршы болуп келгенин баса белгиледи. Эл өкүлү Экономика министрлигинин ишин кескин сынга алды.
Жогорку Кеңештин жыйынында депутаттар Салык кодексине өзгөртүү киргизүү боюнча мыйзам долбоорун талкуулашты.
