Кадыржан Шаршенбек уулу: атам чыкпаганда дөбөт карышкыр мени жарып кетмек

Окуянын кандай болгонун Шаршенбек уулу мындайча айтып берди.

"Таңга жуук айылга беш карышкыр түшүптүр. Уй мөөрөй бергенинен жибине чалынып калды го деп сыртка чыксам, карышкыр маңдайыман чуркап келе жатыптыр. Ал дароо эле моюнга асылды, бирок ага тиштетпестин аракетин кылдым. Бир маалда санымды тиштеп жулмалап кирди. Санымды жулуп салбасын деп колумду анын оозуна салып, өйдө тарттым. Аңгыча болбой эле кайта моюнга асылды. Аны күчкө салып жерге жыкканда колумду чайнап жиберди. "Ата" деп кыйкырдым, анан атам чыгып аны баштан алды. Бул убакта келинчегим дагы чыгып калыптыр. Жерден сыйпалап жатып колума кыш урунду, аны менен башын жанчып өлтүрдүк. Атам чыкпаганда жарып кетмек экен", — деди ал.

Шаршенбек уулу эгер жырткыч кутурма болсо ал жукпасын деп ооруканага дароо келгенин кошумчалады. Ошондой эле мергенчилер тоодон бир карышкырды жарадар кылып, үчөө качып кеткенин айтты.

"Мен эмес башка жаш келин же абышкалар чыкканда аларды аларды жарып кетмек экен", — деди ал.

Жабырлануучу карышкырлар кошунасынын отуз коюн жара тартып, туугандарынын эки итинин башын чайнап,  тааныштарынын эки күлүк атын тиштеп кеткенин баса белгиледи.