БИШКЕК, 5-фев. — Sputnik. Премьер-министр Сооронбай Жээнбеков Дача айылындагы авиакырсыктан жабыр тарткандарга жардам көрсөткөн ыктыярчылардын тобу менен жолукканын өкмөттүн маалымат кызматы билдирди.
Суроо-жооп иретинде өткөн жолугушуу кырсыктан курман болгондорду эскерген бир мүнөттүк таза күтүү менен башталды.
Жээнбеков өз сөзүндө кырсык элдин башын бириктиргенине токтолуп, жабыркагандарга жардам берип, убагында кийим-кечектер, керектүү азыктар менен камсыз кылып, биринчи жардам көрсөткөн ыктыярчылардын жардамын баса белгиледи. Аны менен катар өлкөнүн бардык аймагында каражат чогултуу иштери уюштурулгандыгын да кошумчалады.
"Мен өкмөттүн жана жеке өзүмдүн атымдан сиздерге жана кайдыгер калбаган жарандардын баарына, активисттерге, ушул кырсыктын алгачкы сааттарында, биринчи күндөрүндө, андан кийинки алгачкы аптада колдон келгендин баарын жасап, кырсыктын кесепетин жоюуга катышкан жарандарыбызга терең ыраазычылык билдирем", — деди премьер-министр.
Ал өз ара жардамдашуу жана ынтымак кыргыз элинин канындагы жакшы сапат экенин белгилеп, илгертеден бери келаткан "ашар" деген салт азыркы тил менен айтканда волонтёрдук деп аталарын кошумчалады.
Ыктыярчылар жабыркагандардын мындан ары тагдыры жана көрүлүп жаткан чаралар тууралуу түрдүү суроолорун берип, мамлекеттик органдарга өз сунуштарын айтышты.
Эскерте кетсек, 16-январда Гонконгдон Стамбулду көздөй келе жаткан жүк ташуучу учак "Манас" аэропортуна май куюу үчүн конмок болуп, Дача айылына кулап түшкөн. Кырсыктын кесепетинен 39 адамдын өмүрү кыйылган. Анын 17си балдар экени аныкталган.
