БИШКЕК, 5-фев. — Sputnik. Быйыл ажылыкка барчуларды каттоо 6-февралда башталат. Бул тууралуу муфтияттан билдирди.
Ага ылайык, ажылык сапарга баруучуларды каттоо 6-февралдан 6-мартка чейин муфтияттын облустук, шаардык казыяттарында жана райондук хатибияттарда жүрөт.
Ажыга баруучулар бир нече жылдан бери чучукулак кармоо жолу менен аныкталып келет. Муфтият чучукулакка катыша тургандарга коюлуучу талаптарды айтып берди. Башкысы — Меккеге аттанган кишинин курагы 18 жаштан кем болбошу шарт. Андан сырткары өзү менен ажылыкка катталуу үчүн РСК банкына төлөнгөн 500 сомго берилген дүмүрчөктү, өзү жашаган аймактагы мечиттин имамынан алынган мурда ажылыкка барбагандыгы боюнча маалымдама кат, чет элдик паспортун, ID-картасын, (3x4) көлөмүндөгү 4 сүрөтүн ала келиши зарыл.
Белгилей кетсек, быйыл ажылыкка 900 квота көп берилип, жалпысынан 4585 квота каралган.
