БИШКЕК, 4-фев. — Sputnik. Эл аралык "Себат" билим берүү мекемесинин уюштуруучуларынын курамына Билим берүү жана илим министрлигинин кирүүсү боюнча өкмөт чечим кабыл алды.
Былтыр Алмазбек Атамбаев жыл жыйынтыгы боюнча берген маалымат жыйынында аталган билим берүү мекемесинин аты "Сапат" болуп өзгөрүлөрүн айткан. Ошол эле учурда президент бул окуу жайларды Фетхуллах Гүлендин уюмуна аралаштырбоо керектигин баса белгилеп, "Себаттын" өлкө аймагындагы окуу жайлары жабылбай турганын билдирген.
Ошондой эле мекеменин атын өзгөртүү боюнча аракеттер болуп жатканын мекеменин башкы директору Нурлан Кудайбердиев дагы тастыктаган эле.
"Себаттын" жаңы уставы иштелип чыкты, эми ал каттоодон өтүшү керек. Уюштуруучуларынын курамын өзгөртүүдөн тышкары, билим берүү мекемесинин атын алмаштыруу да каралууда.
"Себат" билим берүү мекемесинин аймактарда 16 лицейи бар. Андан сырткары, Бишкек шаарында "Ататүрк — Алатоо" университети, эл аралык Silk Road мектеби, 3 орто мектеп жана Бишкек, Ош жана Жалал-Абадда жатаканалары бар.
