БИШКЕК, 6-дек. — Sputnik. Эл аралык "Себат" билим берүү мекемесинин атын өзгөртүү боюнча учурда аракеттер жүрүп, тиешелүү документтер экспертизадан өтүп жатканын аталган мекеменин башкы директору Нурлан Кудайбердиев Sputnik Кыргызстан агенттигине билдирди.
Белгилей кетсек, өлкө башчысы Алмазбек Атамбаев жыл жыйынтыгы боюнча берген маалымат жыйынында Кыргызстандагы "Себат" билим берүү мекемесинин атын "Сапат" кылып өзгөртүү боюнча макулдашуулар болгонун билдирген.
"Президент айткандай "Себаттын" атын өзгөртүү боюнча макулдашуу болгон. Билим берүү министрлигин "Себаттын" түзүүчүлөрүнүн курамына киргизүү жагы каралган. Биз мындай сунушту түшүнүү менен эле кабыл алдык. Мекеменин атын ребрендинг кылуу боюнча азыр сүйлөшүүлөр жүрүп, тиешелүү документтер экспертизадан өтүп жатат", — деди Кудайбердиев.
Башкы директор ошондой эле атын өзгөртүү боюнча чечим чыккандан кийин баары расмий түрдө айтыларын кошумчалады.
