БИШКЕК, 3-фев. — Sputnik. Жогорку Кеңештин депутаттары Сайдулла Нышанов менен Гүлкан Молдобекова АКШнын президенти Дональд Трамптын сый тамагына катышканын парламенттин маалымат кызматынан кабарлашты.
1953-жылдан бери жыл сайын өткөрүлүп келе жаткан иш-чара бул сапар Вашингтондо бейшемби күнү өттү. Эртең мененки тамактын максаты дүйнө өлкөлөрүнүн саясий, диний, социалдык жана бизнес элитасынын мамилесин чыңдоого багытталган.
Сый тамакка Трамптан сырткары АКШнын вице-президенти Майк Пенс, конгресс менен өкмөттүн мүчөлөрү, ошондой эле 140 мамлекеттен келген парламентарий, бизнесмендер жана дин адамдары катышкан.
Ал эми Кыргызстан тараптан депутаттардан сырткары, Кыргызстандын АКШдагы элчиси Кадыр Токтогулов менен БУУнун алдындагы Кыргызстандын өкүлү Миргүл Молдоисаева катышты.
