БИШКЕК, 3-фев. — Sputnik. Ош — Баткен жолунда күйүүчү май ташыган автоунаа кетип баратып үйдүн короосуна кирип оодарылып калган. Бул тууралуу ӨКМ билдирди.
Маалыматка ылайык, жол кырсыгы 3-февралда саат 12:14дөр чамасында Баткен облусунун Кадамжай районундагы Пүлгөн айылында катталган.
"Оодарылып калган автоунаанын ичинде көк май болгон. Анын ичиндеги үч киши жеңил жаракат алып ооруканага жеткирилди", — деп айтылат маалыматта.
Кырсыкка күбө болгон Мырза Добутовдун айтымында, окуя Кадамжайга бараткандагы жаңы салынган айланма жолдо болгон.
"Ошол жолдо чукул бурулуш бар эле. Ошол жерден бурулуп жатканда турак үйдүн короосуна кирип кетиптир", — деди ал.
ӨКМ учурда кырсык болгон жерде куткаруучулар иштеп жатканын билдирип, 40 тонна майдын жарымы төгүлүп калганын кошумчалады. Ушу тапта унаанын ичиндеги майды башка машинага куюп алуу иштери жүрүүдө.
