Кызын жетелеп бараткан аялды коюп кеткен 17 жаштагы шектүү жаран жолдун каршы тарабына келе жаткан машиналардын жарыгынан улам жөө адамдарды көрбөй калганын айтты.
31-январда саат 19.30да айдоочу Коммунаров жана Жеңиш көчөлөрүнүн кесилишинен эки кишини коюп кетип, окуя болгон жерден изин жашырган. Ал Бишкек ШИИБдин Кайгуул милициясы тарабынан кармалган.
"Мен бурулуп жатканда каршы тарапта келе жаткан машинанын жарыгы көзүмө чагылыша түштү. Мен жөө адамдарды көрбөй калдым. Аларды коюп кеткенден кийин коркуп кетип окуя болгон жерден кетип калдым", — деди шектелген жаран.
"Үйгө келгенде ага эч нерсе айтпастан ачкычты бергем. Эртең менен милиция келди", — деди ал.
Жабыр тарткандар Бишкек шаардык травматология жана ортопедия илим-изилдөө борборуна жаткырылган. Аялдын эки буту тең сынган.
