БИШКЕК, 25-янв. — Sputnik. Жалал-Абад шаарынын тургуну 45 жаштагы А.П. коомдук жайда мас абалында жүргөн жеринен кармалып, жанында "АКС-74" куралына таандык 5,45 мм калибриндеги 34 даана ок жана "АКМ" куралына таандык 7,62 мм калибриндеги 4 даана ок табылганын Жалал-Абад ОИИБинин маалымат кызматынан билдиришти.
"Кармалган А.П. аттуу адам Жалал-Абад шаардык ички иштер бөлүмүна алып келинип суракка алынганда, жанындагы октордон башка калаа аймагында катылган октор бар экенин айтып берди. Аталган жердеги даараткананын ичиндеги өзүнчө бөлмөдө 5,45 мм калибрдүү "АКС-74" куралынын 614 даана, ал эми 7,62 мм калибрдүү "АКМ" куралынын 11 даана огу табылды. Жалпы 5,45 мм калибриндеги 648 даана жана 7,62 мм калибриндеги 15 даана ок-дарылары алынган", — деп айтылат билдирүүдө.
Бул фактынын негизинде кылмыш иши козголуп, учурда тергөө амалдары жүргүзүлүүдө.
